Námskeið í Gautaborg

Laugardaginn 31. ágúst hittust starfsmenn og leiðtogar frá íslensku söfnuðunum á norðurlöndunum í Gautaborg. Sr. Ágúst Einarsson prestur í Gautaborg tók á móti hópnum ásamt frábærum hóp íslendinga í Svíþjóð. Þar er frábær aðstaða sem söfnuðurinn hefur aðgang að og vel fór um alla. Einnig komu hópar frá Noregi og Danmörku. Með hópnum frá Noregi var nýr prestur safnaðarin sr. Inga Harðardóttir.

Námskeiðið var blanda af fræðslu og leikjum þar sem áhersla var á sköpunargleði og samhristing. Veðrið í Gautaborg var einstaklega gott og fór því hluti af námskeiðinu fram utandyra. Samvera sem þessi er mikilvæg fyrir safnaðarstarf í söfnuðunum. Þarna fengu Íslendingar búsettir í þrem löndum tækifæri til að stilla saman strengi sína og fræðast og gleðjast saman. Það voru sr. Sigfús Kristjánsson frá Biskupsstofu og sr. Aðalsteinn Þorvaldsson prestur í Grundarfirði sem leiddu dagskrána.