Sr. Arnaldur Máni gefur biskupi katþólskra, Davíð Tencer, súpuÞann 10. júlí s.l. fór um hundrað manna hópur kaþólskra pílagríma að Maríulind við Hellna á Snæfellsnesi. Þetta mun hafa verið tuttugasta ferðin að lindinni en kaþólskir pílagrímar fóru fyrst að lindinni árið 1999. Hópurinn kom við á Staðarstað og þar var messað að sið kaþólskra. Biskup kaþólsku kirkjunnar á Íslandi, Davíð Tencer, stýrði helgihaldinu. Síðan bauð sr. Arnaldur Máni Finnsson, sóknarprestur á Staðarstað, öllum í matarmikla súpu, sem góður rómur var gerður að.

Fyrir nokkrum áratugum var komið upp líkneski af Maríu guðsmóður við lind eina hjá Hellnum á Snæfellsnesi. Lengi vel var lindin kölluð Gvendarbrunnur en margir telja að Guðmudur biskup Arason hinn góði (1161-1237) hafi blessað lindina og að guðsmóðir birst honum þar árið 1230.

Við lindina er gjarnan farið með þessi orð:

„Heil sért þú, María, full náðar. Drottinn er með þér. Blessuð ert þú meðal kvenna, og blessaður er ávöxtur lífs þíns, Jesús. Heilaga María, guðsmóðir, bið þú fyrir oss syndugum mönnum, nú og á dauðastundu vorri. Amen.“